بسم الله الرحمن الرحيم
واخيرا زملاءنا الكرام .. أخدنا الأجازة - أو معظمنا أخد الأجازة - اللي كنا منتظرينها على أحر من الجمر ، وطلعت النتيجه بحلوها وبمرها ، لكن ... اللهم لك الحمد على كل حال ( وعسى أن تكرهوا شيئا وهو خير لكم وعسى أن تحبوا شيئا وهو شر لكم والله يعلم وأنتم لا تعلمون ) صدق الله العظيم .
ومضى من الأجازة أكثر من أسبوعين ...
منا من استفاد منها ورتب وقته ليستغلها ويستثمرها ويخرج رابحا منها .
ومنا - بل قل أغلبنا - من لم يستفد مما مضى ، وليس لديه تخطيط لما سيأتي ، بل والأمَرّ من ذلك يشتكي من الفراغ الذي لايدري كيف يشغله .
يقول صلى الله عليه وسلم : " نعمتان مغبون فيهما كثير من الناس : الصحة والفراغ "
* لذلك وكما تعودنا دائما - في مدونة الدفعة - فكرنا أن نخطط معا لأجازتنا ، نرتب وقتنا فيها معا ، يطرح كل منا مشاريعه في الأجازة .
باختصار ... اطرح على نفسك سؤلا واحدا ، وحاول الإجابة عليه معنا ...
- ازاي أخرج من أجازتي كسبان ؟؟؟؟
عندنا عدة مجالات ممكن نستغل الأجازة فيهم ، زي ...
- أولا : المجال الترويحي ... ممكن أروح عن نفسي ازاي ؟؟؟
- ثانيا : المجال الإيماني ... ممكن أرتقي في عباداتي ( صلاة ، قرآن ، صيام ، ...) ازاي ؟؟؟
- ثالثا : المجال الرياضي ... ياترى ممكن ألعب ايه في الأجازة ، واستفيد من اللعب ؟؟؟
- رابعا : المجال الثقافي ... هل ممكن أزود ثقافتي في الأجازة - كتب ، شرايط ، كمبيوتر - أو بأي وسيلة أخرى ، طب ازاي ؟؟؟
- خامسا : المجال العملي ( Clinical ) ... هروح مستشفيات ، طوارئ ، عيادات ، ولا هطور نفسي عمليا ازاي ؟؟؟
- سادسا : المجال الدراسي ( الطبي ) ... - نأسف للإزعاج -
هل عندي استعداد ، ولو على الأقل اسمع حاجه من السنة السادسة ، أو اقرأ ولو على سبيل الاطلاع - خصوصا ان احنا داخلين على بكالريوس -
- سابعا : لو فيه أي مشروع ممكن نعمله مع بعض كدفعة ، نتبنهاه كلنا ويكون مشروعنا التعاوني في الأجازة ..
- دي عدة مجالات ذكرناها على سبيل المساعدة ، ولو عندك مجالات تانية ياريت تفيدنا بيها .
* الخلاصة :
عايزين نشوف كل واحد مننا ناوي يستثمر الأجازة ازاي ؟؟ وناوي يعمل ايه في كل مجال من المجالات اللي فاتت دي ، أو لو عنده مجال تاني ؟؟
يعني بصراحة عايزين نساعد بعض عشان ما نخرجش من الأجازة زي ما دخلناها ، وبعدين نرجع نقول لما تخلص لواحنا في أول الأجازة كنا هنعمل ونسوي ...
ياريت ماحدش مننا يستصغر فكرته أو ترتيبه لأجازته ، ويحرمنا منه ، يمكن الكلمة أو الفكرة أو نظام أجازتك ده يستفيد منه أي حد من زمايلك فينفذه ، فيأجرك الله سبحانه وتعالى عليه .
- ازاي أخرج من أجازتي كسبان ؟؟؟؟
نحن في الانتظار ....
*****************************************
* تنبيه هام :
- إن شاء الله تعالى ستكون مدونة - الرأي - متابعة لكل مايهم زملاءنا المؤجلين في سنة خامسة ، وذلك حتى نهاية امتحانات التاجيل ، نسأل الله لهم التوفيق والتيسير .
- فيما ستكون مدونتكم -الرأي (+) - هي الصفحة الأساسية في دفعة الفرقة السادسة ( حديث ) وذلك أيضا حتى نهاية امتحانات التأجيل .
والله ولي التوفيق ...
هناك 3 تعليقات:
بسم الله
الحمدلله الذي هدانا لهذا وما كنا لنهتدي لولا ان هدانا الله
بالنسبة للتخطيط للاجازة فانا بادعي ربنا يوفقني اني استفيد منها قدر المستطاع
اولا الترويحي
ان شاء الله باخطط لزيارة كل الاصدقاء والزملاء في الفترة دي بحكم انهم في اجازة زيي ، وكنت بافكر نطلع رحلة كلنا مع بعض طلبة الفرقة السادسة حديث
في اكتر من واحد كلمني في الموضوع ده - الرحلة -وكله متحمس ومتشجع فانا باقترح على الجميع انه لو عندهم استعداد للخروج في رحلة سرعة الرد هنا واقتراح مكان يراه مناسب للرحلة وفي انتظار الردود
الايماني
بسال ربنا ان يوفقني في المحافظة على صلاة الفجر - وبالتبعية كل الصلوات - في جماعة ، وان شاء الله الواحد يكون له ورد يومي من القران الكريم ، وطبعا لا ننسى صيام الست من شوال
اضف الى ذلك الاستفادة من الفراغ في حضور جلسات العلم و القراءة و الاطلاع اكثر واكثر
الرياضي
طبعا لعب الكرة من الاصدقاء
وكتر الخروج والسفر والرحلات كلها تعتبر رياضات نستفيد منها
علمي
رحت اكتر من مرة مستشفى طيبة قطور ، كنت فيها مع الدكاترة الزملاء اللي اكبر مننا بسنتين او تلاتة وعندهم نبطشيات بالليل - مستشفى طيبة تعتبر مستشفى خاصة - وطبعا الاستفادة موجودة ، وان شاء الله متفق انا والدكتور شادي على النزول الى الطواري ولو حتى مرة في الاسبوع
كلمة قالهالي دكتور طارق وهو اكبر مننا بسنيتن وواقف نبطشية في طيبة قطور انه بعد خامسة خد اجازة كاملة ولم يذهب الى المستشفى ولا يحزنون
واضاف انه في اسبوعيين اتنين بعد 6 وقبل الامتياز تعلم فيها حاجات كتيرة جدا
بالنسبة للمجال الدراسي
فلا اعتقد ان البدء من الان فكرة صائبة
انا اري ان كل واحد ياخد اجازته كاملة مكملة ويستمتع بكل دقيقة فيها لانه مش هيشوف الاجازة دي تاني الا في 2010 بااضافة الى ان سنة 6 طويلة جدا ولما تبدا قبلها كمان فهيبقى الموضوع رخم جدا جدا وياريت احنا بس نبدا نذاكر من اول الدارسة في شهر 12
بانتظار الاستماع والاستمتاع ببقية المشاركات
دمتم بخير
دعواتكم
السلام عليكم و رحمة الله
انا شايفه ان الاجازة السنة دي لازم تكون مختلفة عن كل سنة
لان احنا السنة دي الامتحانات حرمتنا من حاجات كتير كنا المفروض نعملها في رمضان
فانا شايفه من وجهة نظري المتواضعة جدا اننا نحاول مع بعض
اللي مكنش مواظب على اذكار الصباح و المساء يحاول مرة في مرة و بعد كده ان شاء الله هتبقى عادة يومية
اللي كانت الامتحانات واخداه شويه و مكنش بيلحق يصلي السنة يحاول يصليها كل يوم شوية بشوية لغاية باذن الله ما يصليها كلها
نحاول كل يوم نقرا ولو صفحتين من المصحف بس نقراهم بجد و نحاول نفهم تفسير الايات
اما بالنسبة للجانب العلمي فلو في حد تعرفو مأجل حاول تساعده ولو حتى بمكالمة تليفون تطمن فيها عليه و ميحسش انه لوحده
لكن بصراحة موضوع المستشفى و الطوارئ و الحاجات دي فانا مفتكرش ان حد ممكن يقضي سنة بكل الطول و بكل التعب ده و بعد كده يفكر يروح يتعلم...تاني!!
وعامة طبعا كل واحد و قدراته و بجد ربنا يوفق كل الناس و تستفيد من اجازتها بجد في كل خير
و بجد بجد شكرا على كل حاجة عملتوها عشانا...
thanks so much
بسم الله الرحمن الرحيم
انا بقي مجرد وجودي وسط اخواتي وامي في البيت واتكلم معاهم دا في حد ذاته برنامج ترويحي متكامل وبالنسبه للعبادات فالله الحمد مواظبه عليها كويس بجانب اهتمامي بأحد المساجد من تنظيف ومكتبه وكل شئ يخص الجزء الخاص بالسيدات في المسجد وكمان ناويه اعمل فهرس كامل لمكتبه ابي التي تضم اكثر من 1500 كتاب وكمان هاخد كورس لغه انجليزيه وبحاول اتعلم الخياطه واتقنت شغل التريكو وبدأت بالفعل بالانتاج بس حاجات كده علي قدي وبدور علي مكان اخد فيه كورس اسعافات اوليه بس لحد دلوقتي مش لاقيت فلو حد يعرف مكان كويس ربنا يجازيه عني خيرا ويقولي بس طبعا من رابع المستحيلات اني ابدأ اي حاجه لسنهالسادسه دلوقتي خاااااااااالص وانا بحب القرأه جدا بقرأ حاليا كتاب اسمه الحقوق الاسلاميه لشيخ محمد حسان وطبعا بجانب مساعات لامي في الاعمال المنزليه ......... اجازه سعيده للجميع
إرسال تعليق